Рекомендовано к публикации Издательским Советом Русской Православной Церкви (ИС 13-314-2142)
Возбра́нному воево́де и победоно́сцу Гео́ргию соста́вим похвалу́, яко хода́таю на́шему и ско́рому помо́щнику: ты же свято́й великому́чениче, яко име́яй дерзнове́ние ко Го́споду, от вся́ких нас бед свободи́, да зове́м ти: Ра́дуйся Гео́ргие, вели́кий победоно́сче.
А́нгелов Творе́ц и всея́ тва́ри Соде́тель, яви́вый тя Це́ркви Свое́й ве́ры побо́рника, и за ве́ру непобеди́маго страстоте́рпца, внуша́ет нам, за по́двиги страда́ний твои́х восхваля́ти тя, свя́те Гео́ргие, си́це: Ра́дуйся, до конца́ Иису́са Сы́на Бо́жия возлюби́вый; ра́дуйся, за и́мя Его́ с любо́вию ду́шу свою́ положи́вый. Ра́дуйся, испове́дниче от Бо́га призва́нный; ра́дуйся, подви́жниче Бо́жиею благода́тию просла́вленный. Ра́дуйся, а́нгелов сожи́телю; ра́дуйся, проро́ков равностоя́телю. Ра́дуйся, Гео́ргие, вели́кий победоно́сче.
Ви́дя гоне́ние нечести́вых на христиа́ны, не убоя́лся еси́ ко́зни их и мучи́тельства, богому́дре, но я́ко до́брый во́ин Христо́в, вся своя́ ни́щим разда́в, во́лею поте́кл еси́ на сове́т их непра́ведный, Христу́ вождю́ и Бо́гу своему́ поя́: Аллилу́иа.
Разу́мно уразуме́в еди́наго Бо́га, в трие́х Ипоста́сех боголе́пно покланя́емаго, тве́рдым умо́м испове́дал еси́ Его́, на собо́рищи нечести́вых, и та́ко обличи́л еси́ безу́мнаго царя́ безу́мное поклоне́ние тва́ри. Сего́ ра́ди за твое́ высо́кое любому́дрие приими́ от нас, Гео́ргие, усе́рдныя похвалы́: Ра́дуйся, еди́наго и́стиннаго Бо́га пропове́дниче; ра́дуйся, Пресвяты́я Тро́ицы ве́рный защи́тниче. Ра́дуйся, ве́лию правосла́вного испове́дания та́йну неве́рным показа́вый; ра́дуйся, и́дольскаго служе́ния пре́лесть обличи́вый. Ра́дуйся, рито́ре боже́ственный; ра́дуйся, витие́ прему́дрости испо́лненный. Ра́дуйся, Гео́ргие, вели́кий победоно́сче.
Си́ла Бо́жия просвеща́ющая вся́каго челове́ка гряду́щаго в мир, и в темни́це тя стражду́щаго посети́ла есть, смиренному́дре Гео́ргие: поне́же ты вся жития́ сего́ тле́нная яко уме́ты презре́в, еди́ному Христу́ прилепи́лся еси́, да за и́мя Его́ до́бре во́инствовав, сподо́бишися тому́ со а́нгелы ве́чно воспева́ти: Аллилу́иа.
Име́я ум и се́рдце Ду́хом Святы́м озаре́нныя, ты по внуше́нию Его́ поревнова́л еси́ подвиза́тися за и́мя Христо́во, до кро́ве стоя́ бо му́жественно в ве́ре, обличи́л еси́ вознесе́нную нечести́ваго собо́рища горды́ню. Сего́ ра́ди хва́лим тя, всему́дре Гео́ргие, си́це: ра́дуйся, щи́те воздви́гнутый на охране́ние благоче́стия; ра́дуйся, мечу́ подъя́тый на посече́ние нече́стия. Ра́дуйся, сто́лпе ве́ры; ра́дуйся, стено́ и утвержде́ние Христо́вы Це́ркви. Ра́дуйся, ве́рных удобре́ние; ра́дуйся, неве́рных страхи посрамле́ние. Ра́дуйся, Гео́ргие, вели́кий победоно́сче.
